(1)

Rinne an Chomhairle Rialaithe athbhreithniú ar an luach saothair a chuirtear i bhfeidhm ar na taiscí i mbainc cheannais náisiúnta na mBallstát a bhfuil an euro mar airgeadra acu (‘BCNanna’ anseo feasta) agus ar an mBanc Ceannais Eorpach (BCE) nach mbaineann le cur chun feidhme an bheartais airgeadaíochta (‘taiscí beartais neamhairgeadaíochta’). Ba é aidhm an athbhreithnithe cur isteach a d’fhéadfadh a bheith á dhéanamh ar thaiscí den sórt sin leis an mbeartas airgeadaíochta aonair a sheachaint, agus comhlíonadh phrionsabal an gheilleagair margaidh oscailte agus comhsheasmhacht i láimhseáil taiscí comhchosúla laistigh den Eurochóras á áirithiú ag an am céanna.

(2)

Tar éis an athbhreithnithe, chinn an Chomhairle Rialaithe go bhfuil gá le trédhearcacht níos fearr maidir le luach saothair taiscí neamhairgeadaíochta. Leagtar amach na rátaí luacha saothair is infheidhme maidir leis na taiscí sin i dTreoirlínte (AE) 2019/671 (BCE/2019/7), (1)(AE) 2024/1211 (BCE/2024/13) (2), (AE) 2022/912 (BCE/2022/8) (3) ón mBanc Ceannais Eorpach agus Cinneadh (AE) 2019/1743 ón mBanc Ceannais Eorpach (BCE/2019/31) (4). Chun trédhearcacht a fheabhsú, chomh maith le comhsheasmhacht ar fud na ngníomhartha dlíthiúla gaolmhara, is iomchuí rátaí luacha saothair a leagan amach ar bhealach cuimsitheach in aon ghníomh dlí amháin chun cumarsáid na rátaí luacha saothair a éascú agus chun gur féidir na rátaí sin a choigeartú amach anseo.

(3)

Níor cheart go rannchuideodh luach saothair taiscí neamhairgeadaíochta le tarchur nó cur chun feidhme an bheartais airgeadaíochta a shuaitheadh go leanúnach nó go struchtúrach agus ba cheart go gcosnódh sé feidhmiú ordúil an mhargaidh agus, ar an gcaoi sin, teorainn a chur leis an scóip atá ann do luaineacht mhór na dtaiscí sin.

(4)

Shocraigh an Chomhairle Rialaithe an príomhráta beartais luacha saothair ag ráta gearrthéarmach an euro (euro short-term rate, €STR) lúide raon difríochta. Tá an leathadh inchoigeartaithe go héasca i gcás ina n-athraíonn dálaí an mhargaidh chun éifeachtacht tharchur an bheartais airgeadaíochta a chaomhnú agus ag an am céanna íoslaghdú a dhéanamh ar an riosca go mbeidh sreafaí tobanna isteach i margaí airgid nó amach astu agus creat luach saothair simplí agus comhsheasmhach a cheadú, le fíorbheagán eisceachtaí. Tá an leathadh socraithe ag an gComhairle Rialaithe, agus déanfaidh sí é a choigeartú de réir mar is gá, chun cuspóirí an bheartais luacha saothair a bhaint amach agus chun éifeachtaí diúltacha ar chur chun feidhme an bheartais airgeadaíochta nó ar fheidhmiú an mhargaidh a sheachaint. Tá an raon difríochta socraithe ag 20 bonnphointe faoi láthair.

(5)

Chinn an Chomhairle Rialaithe go bhfuil gá le dialltaí nó eisceachtaí áirithe ón bpríomhráta beartais luacha saothair. Ba cheart go leanfadh coincheap na huasteorann d’fheidhm a bheith aige maidir le híocaíocht taiscí rialtais agus taiscí beartais neamhairgeadaíochta áirithe eile, chun ligean do BCNanna luach saothair a thabhairt do thaiscí den sórt sin ag ráta níos ísle ná an uasteorainn nuair is iomchuí, agus coinníollacha a bhaineann go sonrach le tír faoi leith á gcur san áireamh, amhail na coinníollacha i margadh na n-idirbheart athcheannaigh. Ba cheart feidhm a bheith ag raon difríochta níos ísle ná 20 bonnphointe, a socraíodh ag nialas ar dtús, i gcás cistí ráthaíochta atá i seilbh bhonneagair mhargaidh airgeadais an Limistéir Eorpaigh Eacnamaíoch amhail córais íocaíochta, contrapháirtithe lárnacha agus taisclanna lárnacha urrús, chomh maith le cuntais réamh-mhaoinithe a shealbhaítear i TARGET, i bhfianaise thábhacht na sealúchas sin le haghaidh córais íocaíochta a oibriú go rianúil agus cobhsaíocht airgeadais. Cistí is gá a thaisceadh go sealadach leis na BCNanna nó leis an BCE i ndáil le cúnamh airgeadais, ba cheart go leanfaidís de bheith díolmhaithe ó rátaí diúltacha.

(6)

Chinn an Chomhairle Rialaithe freisin gur gá foráil a dhéanamh, i gcúinsí áirithe, go bhféadfaidh BCE faisnéis ghráinneach maidir le taiscí beartais neamhairgeadaíochta a iarraidh ar BCNanna agus a roinnt laistigh den BCE agus den Eurochóras ar bhonn dian-riachtanais eolais nuair a chinneann an BCE, ar bhonn cás ar chás, go bhfuil gá leis an bhfaisnéis sin chun cur ar chumas an Eurochórais measúnú a dhéanamh ar an tionchar a d’fhéadfadh a bheith ag na taiscí sin ar chur chun feidhme an bheartais airgeadaíochta.

(7)

Chun na cuspóirí sin a bhaint amach agus chun a ndóthain ama a thabhairt do BCNanna ullmhú do chur i bhfeidhm an bheartais luacha saothair nua maidir le taiscí neamhairgeadaíochta, ba cheart feidhm a bheith ag an gCinneadh seo amhail ón 1 Nollaig 2024,

(1)

ciallaíonn ‘taisce’ comhardú creidmheasa in euro nó in airgeadra eile a eascraíonn as chistí arna sealbhú i gcuntas le BCN nó BCE nó ó staideanna sealadacha a thagann as seirbhísí arna soláthar ag BCN nó BCE agus a mbíonn dliteanas arna thaifead ar chlár comhardaithe BCN nó BCE mar thoradh orthu, ar dliteanas é nach mór do BCN nó BCE a aisíoc faoi na coinníollacha rialála nó na coinníollacha conarthacha is infheidhme, agus taiscí thar oíche is taiscí ar théarma seasta san áireamh ansin;

(2)

ciallaíonn ‘€STR’ ráta gearrthéarmach an euro mar a shainmhínítear in Airteagal 2(2) de Threoirlíne (AE) 2019/1265 ón mBanc Ceannais Eorpach (5) (BCE/2019/19) agus arna fhoilsiú ag BCE;

(3)

ciallaíonn ‘€STR OIS’ babhtáil innéacs thar oíche (overnight index swap, OIS) mar a shainmhínítear in Airteagal 1 (25) de Rialachán (AE) Uimh. 1333/2014 ón mBanc Ceannais Eorpach (BCE/2014/48) (6), i gcás ina dtagraíonn na híocaíochtaí ráta úis comhlúthaigh tréimhsiúla do €STR mar an ráta innéacs thar oíche;

(4)

ciallaíonn ‘taiscí beartais neamhairgeadaíochta’ taiscí nach ndéantar a fhorghníomhú chun an beartas airgeadaíochta aonair arna chinneadh ag an gComhairle Rialaithe a chur chun feidhme agus a thagann faoi raon feidhme ceann amháin díobh seo a leanas: